مقدرش أصبر

مقدرش أصبرع الفراق
مقدرش أكتر ع النوى
ده الحبّ نار والإشتياق
ياما حرق قلبي وكوى

إرحم بقى وارجع قوام
يا نور عيون قلبي أنا
والله حرام أسهر ونام
وعيش بعيد عنك هنا

حاولت اقاوم وانتظر
وصبّر القلب العليل
بسّ اشتياقي ليك كبر
والوقت ع المشتاق طويل

مين بسّ يقدر يا قمر
يصبر على بعد الحبيب
لوكان هواه بالشوق أمر
والوصل مش باين قريب

لكلّ شيء يا عمري حد
بالرغم مما تشتهي
حتى الجفا مع أيّ حد
آخرته رايح ينتهي

شكراً جزيلاً

شكراً جزيلاً يا قمر
يا منوّر الكون والبشر
من بعد حيره وطول سهر
متّعت قلبي بالنظر

يا ليل خلاص هلّ الصباح
لمّا القمر نوّر ولاح
يا عين خلاص عهد الجراح
ويّا القمر ولّى وراح

شكرا جزيلاً ع الأمان
اللي انتظرته من زمان
شكرا جزيلاً ع الحنان
اللي اتملا بدفئه المكان

شكرا حبيبي وأوعدك
هصون هواك مهما حصل
راح ابسطك وأسعدك
وخلّي أيامك عسل

محدش قدّي يا جميل
هيعشقك ويميل إليك
محدش قدّي ومستحيل
هتلاقي حد يخاف عليك

محدش قدّي

يا نور عيوني ما حدش قدّي
عشق غرامك وهام بحبّك
بسّ انت فضلت أعيش لوحدي
ونا اللي فكّرت هعيش بقربك

معقوله أسهر وبات افكّر
من غير مقلبك يحسّ بيّه
معقوله تتقل أكتر وأكتر
من غير متعطف ولو شويّه

يا نور عيوني فضلت صابر
رغم العواذل وكلّ واشي
ليه اللي صادق في الحبّ خاسر
أمّا المنافق فحظه ماشي

سنين وقلبي حيران وخايف
أيام عذابه تطول في بعدك
سنين وقلبي سهران وشايف
إزّاي شبابه بضيع بعندك

لو بسّ أعرف لو بس تقوللي
ليه الملاوعه والقسوه ديّه
عملت إيه بس عشان تخلّي
دموع عينيّه تفضل سخيّه

حبيبي بلقاك

حبيبي بلقاك نسيت الهوان
نسيت العذاب وظلم الحياه
حبيبي بهواك رجع لي الأمان
رجع لي الشباب بفضل الإله

أمانه يا رب تصون حبنا
أمانه في علاك تكون جمبنا
مليش في الحياه يا ربي سواه
مليش غير هواه مليش غير رضاه

تعال يا حب وسدد لنا
خطانا ع درب يلم شملنا
تعال وعيد أمال عهدنا
تعال وزيد جمال وعدنا

حبيبي في حماك غمرني الهيام
غمرني الشعور بصدق الغرام
وقلبي برضاك ع ذاتي اهتدى
وحلمي اكتمل وعمري ابتدا

يا دنيا افرحي ولا تجرحي
وهيّا افتحي ببان الهنا
حبيب الفؤاد من الغربه عاد
لحض البلاد وحضني أنا

يا قلبي سمّع

يا قلبي سمّع ضحكتك
من غير تردد أو خجل
وعدك خلاص جه في سكتك
واللي انتظرته سنين وصل

يا قلبي افرح بالحبيب
وارقص وغنّي للحياه
ده السعد جالك والنصيب
اللي انكتب لك جه معاه

يا قلبي قوم وافتح عينيك
وشوف جمال الكون بقى
بطّلت اخاف واقلق عليك
بعد الوصال ده واللقا

يا قلبي بص غرام كده
محدش قبلك حسّ بيه
غرام جميل بالشكل ده
محدش عاش لو ثانيه فيه

يا قلبي افتح للغرام
والحبّ قلبك من جديد
ده الكون بحاله يا سلام
صبح جميل معاه وسعيد

فين الطرب

ليه يا زمان عهد الجمال
من الوجود راح والخيال
حتى الطرب أصبح محال
لمّا انكتب لولاد عيال

فين الهيام فين الغرام
فين المعاني في الكلام
فين الأغاني يا حرام
دي بهزّتين تخلص قوام

فين الطرب بتاع زمان
معدش له بينا مكان
دلوقتي بس والله الجنان
عمّال يكسّر بالودان

أيام زمان مش أيّ حد
غنّى وقال أطرب بشر
مش أيّ حد ترك بجد
على القلوب بصمه وأثر

دلوقتي أي واحد بقول
عن نفسه سيد المطربين
فكره بغنوه راح ينول
حب البشر والمعجبين

ايام زمان كان مستحيل
في المغنا يظهر صوت جديد
إلاّ إذا كان صوت جميل
ملوهش بالصيت والرصيد

برضه الكلام مش ده الكلام
اللي انكتب ايام زمان
ولا الغرام هوّ الغرام
ولا الحنان هوّ الحنان

ده المغنا كان حلو وجميل
والفن كان مشغول بحب
حتى القلوب جيل بعد جيل
حافظه الكلام عن ظهر قلب

غار يا قمر

غار يا قمر من حبيبي
غار من جماله وحسنه
ده كان حبيبي ونصيبي
من صغر سنّي وسنّه

عشان حبيب قلبي أجمل
بلون عيونه الكحيله
كمان ده أحلى وأفضل
بنور خدوده الجميله

غار يا قمر من غرامه
وشوق عيونه لعيوني
غار من حنينه وهيامه
وحبّه ليّه الجنوني

غار يا قمر برضه مني
عشان بحبه لذاته
غار حتى مني لأنّي
بفدي بحياتي حياته

ده حبه والله أسرني
لحظة مبصّ في عينيّه
وحسنه برضه سحرني
لحظة مهلّ عليّه

غار يا قمر من مشاعري
ومن عواطفي النبيله
غار من قصايدي وخواطري
وسنين غرامي الطويله

غار يا قمر بسّ حاسب
تجرح حبيبي بكلمه
غار بسّ إيّاك تعاتب
عشان غرام قلبه نعمه