لسّه فاكر

لسّه فاكر يا حبيبي
كلّ حاجه بالتفاصيل
حتى فاكر نار لهيبي
واشتياقي في المراسيل

كان غرامك عشق عمري
عشق قلبي ونور حياتي
كان هيامك سرّ صبري
سرّ حبي وكنه ذاتي

لسّه فاكر كل قعده
تحت أشجار الخمايل
برضه فاكر كل ورده
ع الجبين أو ع الجدايل

لسّه فاكر كلّ رابيه
وكلّ قصة حب جميله
برضه فاكر كلّ ساقيه
وكلّ نسمة شوق عليله

لسّه فاكر كل غنوه
وكل كلمه وكل همسه
برضه فاكر كل نشوه
وكل بسمه وكل لمسه

لسّه فاكر كل رحله
في المواني والصحاري
برضه فاكر كل جوله
في المداين والبراري

لسّه فاكر كل ثانيه
عشتها ويّاك برقّه
برضه فاكر كل ناحيه
روحتها وياك بجرأه

بس يا خساره يا قلبي
كل شيء ضاع من إيديّه
آه لو ترجع يا حبي
آه لو ترحم عينيّه