جاي تعمل ايه

جاي تعمل ايه دلوقتي بس
لمّا الزمن بالعمر راح
وجايّ ليه دلوقتي بص
تلج المشيب في الشعر لاح

طب كنت فين من كام سنه
لمّا الشباب بالعطر فاح
لمّا الهنا كل الهنا
كان من نصيبي والنجاح

جاي تعمل ايه بعد السنين
مجرّحت قلبي كمان
هوّ الزمان ولا الحنين
خلوا الحياه ماشيه بأمان

يا عمّ والله مصدقك
بكلّ كلمه عن هواك
ونا الحقيقه بعشقك
بعشق جمالك وبهاك

بس الجمال ده يا قمر
من حق حد غيري تمام
مش حق حد زيّي انكسر
من قبل منك في الغرام

مقدرش اسمح للغرور
عن الحقيقه يمنعك
مقدرش حتى لو تثور
أرضى لغروري يخدعك