جزيره

قالوا الهنا والخير هنا
خضره وهوا بحر وسما
قالوا النوى أحسن دوى
للّي انكوى بنار الهوى

بسّ الحقيقه يا جميل
نسيان هوانا مستحيل
عشان زمان قبل النوى
زرنا المكان لتنين سوى

في كلّ حته أو مسار
بشوف خيالك ليل نهار
بعيش معاه عمري السعيد
في كلّ مرّه من جديد

بلمح جمالك في الزهور
بسمع كلامك للطيور
بمشي معاك تحت المطر
بجري وراك وسط الشجر

بحسّ بيك فوق التلال
فوق الهضاب فوق الرمال
بشتاق إليك عند الأصيل
قرب السنابل والنخيل

قلبي معاك عند السهر
عقلي معاك حتى السحر
بنسى المكان بنسى البشر
حتى كمان بنسى القمر