الحظ

يا حظّ قوللي انت إيه
صنع الخيال أو شيء أكيد
أيّا تكون يا حظّ ليه
دايما معايا وبس عنيد

يا حظّ لو كنت بحقيق
أو كنت ظن في قلبنا
ليه بسّ دايما كالغريق
عايزين وجودك جمبنا

يا حظّ مين فتحت له
قلبك بفرحه عاش سعيد
ومين يا حظ قفلته له
قلبك بجرحه بات وحيد

يا حظ لمّا تكون جميل
إزّاي بتختار بعضنا
وليه بقى دايماً بخيل
مع الغلابه زيّنا

يا حظّ بص هوّ الفقير
ملوهش قلب يقدر يحب
ولاّ الكبير عشان كبير
هوّ اللي وحده عنده قلب

يا حظّ حس خلّيك حنون
خلّيك عطوف ع الكل بقى
حتى الفقير ده له عيون
ولاّ الفقير عاش للشقا