حرام

والله حرام والناس في عيد
تفضل بعيد عني وعنيد
والله حرام والعام جديد
قلبي الوحيد في الكون شريد

والله حرام تنسى الغرام
تنسى الموده والوئام
والله حرام أجمل هيام
في العيد كمان يصبح خصام

ده العيد محبه وانشراح
والناس بنشوه وارتياح
غير بسّ قلبي للصباح
سهران مع الخوف والجراح

إشمعنى بس قلبي أنا
والدنيا عيد حظه الضنا
واشمعنى بس وحدي هنا
محروم من الحب والهنا

إرجع حبيب قلبي وعود
إرجع وصون بينا الوعود
ده انت المطر بعد الرعود
من غير لقاك ملناش وجود

إرجع حبيبي ده الغنا
والرقص واصل للسما
ده انت الهنا وانت المنى
وكفايه بعدك كام سنه

إرجع عشان رغم الزهور
رغم المعايده والسرور
قلبي الحزين قرّب يثور
على الغرور ده والفتور